大除夕

今日大除夕，天 文 台已 發 出 入 冬 以 來 首 個 寒 冷 天 氣 警 告 ， 氣 溫 仲會跌 至 10 度 ，小熙琳已做足預防措施，看看小熙琳肥左又重左，並且已經被禁閉，唔准出街，公公今日來看佢，都只可以在家中行來行去，不過公公都幾得，可以抱到小熙琳入睡，而小熙琳又乖乖冇扭計。

而家小熙琳都識嘢，當我同縉軒哥哥去街，一柵門佢就喊，因為佢知自己冇份去。

今日小熙琳洗澡時，因氣溫太凍，很快便上水，小熙琳竟然又喊，可能唔夠喉掛。

公公萬歲!!!

公公好鍚小熙琳架! 今天已是這星期第四次見面了，小熙琳由早上小睡醒來後，一直等公公來，等到點幾鐘，又係眼瞓的時候，公公終於出現，小熙琳見到公公都冇喊，仲可以抱添，唔通她已認得公公? 公公帶小熙琳去海邊散步，但冇幾耐小熙琳就瞓著了，但我們都沒有番屋企，因公公提議去餐廳食嘢，然後等小熙琳瞓醒，再行過，公公原全唔捨得小熙琳。 小熙琳長高了不少，d衫全部長度都短了一截，露出一雙小肥腿，公公忍唔住，要買兩件大件d既衫給小熙琳。全程都是由公公抱著小熙琳，話時話小熙琳都有14磅幾重，抱足兩個鐘，公公都幾犀利喎!

P.S. 婆婆都有買衫給小熙琳，看看小熙琳著住的粉紅背心，就是婆婆買的，幾靚。

剪咗啦.......

Before

今天帶了小熙琳去剃頭，個師傅都ok架，熙琳爸和縉軒哥哥的頭，也是她剪的，佢自己的仔女個頭都係佢自己幫佢剃，仲比埋相我睇，佢個女剃完後現在都有一靶濃密的頭髮。一開始，小熙琳被開著電刨的聲音吸引着，師傅於是即刻去搵個玩具高飛來，引開她的注意。初初小熙琳的視線的確轉移到高飛身上，但當一開始剃頭後，小熙琳可能因為唔鐘意人攪佢個頭，於是喊起來，師傅又即刻去搵第二樣玩具來，今次找來一個木琴，於是我敲擊了幾個音，但她仍然喊，後來師傅的助手，又係用木琴敲d音樂來引小熙琳，擾攘了一陣，終於大功告成，前後五分鐘都唔洗，仲有專人奏樂，都只不過係28蚊，抵到爛。

After

現在的小熙琳搖身一變，成為一個光頭妹了，在這個寒冷的冬天，需要帶帽取暖啊！

心大心細

現在的小熙琳個頭仍然只係得幾條毛仔，冇乜頭髮，婆婆叫我地帶小熙琳去剃光個頭，這樣才會長出濃密的頭髮，好似鍵朗表哥咁，不過藍藍姐姐都冇做過光頭妹，但都有一排頭髮，雖然柔軟d，但都可以扎到條邊仔。熙琳爸話小熙琳做光頭妹好肉酸，但聽了婆婆的說話後，又心大心細，唔知點好。不過，又要在那裡才能找到一個有經驗的師傅呢?

聖誕快樂

昨晚平安夜，到了姨姨家開party，小熙琳第一次過聖誕，收到很多聖誕禮物，真係要多謝各位付出過的朋友們，可能小熙琳有街街去實在太興奮，心野野，興奮到可以唔駛飲奶奶，由下午到晚上，開了兩次奶奶比佢都唔飲，都只係飲了4安奶落肚，浪費了8安奶。女呀女! d奶奶要錢買架，唔好咁浪費啦! 番到屋企，幫小熙琳做好清潔，眼仔碌碌玩了一陣，嘩! 等到11點幾佢都仲未叫食，乜4安奶可以咁飽肚?

大合奏

昨日，縉軒哥哥由學校帶了他的長號回家練習，今日終於見識到長號的聲音了，原來有些似放屁聲，今日有一幕攪笑情景，正當哥哥在房練習，而小熙琳則在房外食奶奶，點知食食下，小熙琳要先和哥哥來一場合奏，哥哥用長號，小熙琳就用屁股.....砵....砵.....砵....來一個便便。



縉軒哥哥剛學了16堂，有些走音在所難免，不過吹得都算ok啦，下次看見縉軒，大家記得給他一些鼓勵說話


小心比佢嚇親喎!

第一次

今天，同小熙琳散步到海灘，第一次到海灘，給她看看海、看看浪花、同太陽伯伯打聲招呼，其間有一位外籍小朋友(約1歲---剛學識行)，主動行到小熙琳身旁，看看小熙琳。明年的今天，相信可以帶同小熙琳來玩沙、玩水。

小熙琳看了一陣便倦極入睡，而小熙琳現在有14磅重，抱住瞓著的小熙琳行回家，都幾和味，可能抱得小熙琳多，現在我的手臂都幾粗壯。

又一傑作

小熙琳又多兩件媽媽牌冷衫啦! 暫時要停工了，太多小熙琳都著不完。現在，轉移目標了，幫大隻仔表哥織番件溫暖牌。

好介紹

最近，熙琳爸的同事 Auntie Chan介紹了一本書給我，佢話對小朋友早期教育好有幫助，本書是講一個中國鄰家女孩給哈佛大學收錄的求學成功路，本書主旨：孩子成為人才還是庸才，不是決定於天賦的多少，而是決定於早期教育加後繼教育的綜合成效。

Auntie Chan 都是參考這本書的教育方法培育她的仔仔，佢話佢個仔次次考試都唔會超出五名之外，仲話好有用，仲話現在開始教小熙琳都係時候，我看過本書，原來現在正是小熙琳腦部發展得最快的時候，容易吸收及記住，對佢將來讀書有幫助，所以現在要多介紹身邊每樣事物給她認識，並且培養佢閱讀的興趣。

臭B

今日比小熙琳攪到氹氹轉，小熙琳中午洗了白白，點知在6點幾，小熙琳開了一個大，份量太多，在大肶位置漏了出來，兼且一背脊都係，見佢咁唔再沖涼都唔得啦! 於是我們即刻預備，由於小熙琳周身便便，不可抱埋身，我們一人抬住小熙琳上半身，另一人抬下半身，將小熙琳帶到浴室去，小熙琳不斷地喊，她可能覺得奇怪，點解我們會這樣抱她，有些驚、冇安全感，見佢喊得咁凄涼，唯有將佢個屎屁股放在我的大肶上安撫她，攪完一輪，小熙琳終於變番香噴噴。

P.S. 件衫D便便漬洗極都洗唔甩，冇辦法，唯有報銷，件衫好靚，我好鍾意架；真係要同舅婆講聲唔好意思，將佢送既衫攪成咁

過關

今日，帶小熙琳到健康院檢查兼打針，11:30到達後，等了很久，等到小熙琳都瞓著埋，才輪到小熙琳，入到姑娘房，姑娘看見小熙琳瞓著，都叫小熙琳唔好瞓，因為小熙琳要進行小測驗，姑娘先將一個搖鈴放近她的左手，看看小熙琳能否自己伸手去握住，ok 冇問題後就試右手，然後用個紅色冷球放再她眼前，看看她的視線能否跟著冷球轉去左邊和右邊，姑娘話小熙琳在這樣的半睡狀態下都能做得到，都不錯。接著，小熙琳要打第二枝的混合針，今次打在小熙琳的左肶上，枝針打落去時，小熙琳都有喊兩聲，打完出番去大堂坐下後，小熙琳已收聲，其他的媽咪都讚小熙琳叻女打完針一d都唔喊，我見其他媽咪的寶寶打完針後，喊了很久都未收聲，咁樣係咪正明小熙琳幾 un-皮。

四個月大的小熙琳

不經不覺小熙琳已四個月大了，現在的她：條腰和頸都硬淨左；頭髮比出世時少了些；個樣越來越似男仔；好似一個大公仔；還有......

1) 小熙琳每朝晨早6點幾起床，必然會大聲用佢既專用語言BB話聊我傾計，每每因為太嘈被熙琳爸趕出房

2) 小熙琳扭眼瞓時，都幾殘雞，她通常都會很惡死，並且很大、很大聲叫喊，兩腳還會出力伸直，要你行就行，企就企，完全由佢話晒事

3) 小熙琳的手仔開始靈活了，所以當抱抱小熙琳的時候，都會被她的小手蚊耳仔、蚊頭髮、打面珠、met 喉嚨，都幾痛架

4) 小熙琳開始認聲和認人，差不多每星期都與公公、婆婆見面，但小熙琳一見他們都仍然會用喊聲來與他們打招呼

5) 小熙琳現在最鍾意吮手指，尤其是食指和中指，很少食奶嘴了，但想瞓覺時，她仍然會吮奶嘴，但這個奶嘴是聰明人才能看得見的隠形奶嘴

6) 小熙琳都幾喜歡看書

有嘢睇....

今日又去了鍵朗表哥屋企玩，玩得好開心，表哥沒有再蝦小熙琳了，仲玩得很開心添。另外，姨姨仲幫小熙琳拍了一輯沙龍，質素簡直同去影樓影相一樣，正呀!

超大型玩具

上星期，姨姨給了一隻大青蛙給小熙琳，看看小熙琳玩得幾開心!

白費心機

星期六，得閒有時間，便諗住帶小熙琳落樓下到海邊散步，等佢可以近距離望吓海、睇吓船、聽吓浪聲，不用只在家窗口望海咁單調。點知落到去海邊，可以望海的時候，只係幾分鐘路程，佢竟然合埋眼瞓冧左。

不禮貌對待

今天下午帶同小熙琳到姨姨家，探望大隻仔表哥，希望他們可以做個朋友，一齊玩耍，初初大隻仔表哥都幾含羞，但後來大隻仔表哥竟然做起鹹豬手來，明目張膽掀起小熙琳條裙仔，又捉住小熙琳隻腳咬佢隻襪，咬到隻襪濕晒。大隻媽我諗你要教吓大隻仔，點樣做個紳士，下次唔好再咁樣對待小熙琳，不過下次小熙琳都會著番條長褲，才與大隻仔表哥見面。(鳴謝記者花張事件拍攝下來)

新發現

有一個方法可令正在喊緊的小熙琳收聲， 想知是甚麼，睇睇片。

第一次喝蘋果汁

姨姨為了賀小熙琳兩個月大，特別給小熙琳送來一樽蘋果汁

除了母乳外，小熙琳只喝過兩次水，現在有蘋果汁喝，小熙琳竟然喝得津津有味

因為我們想試一試味道，所以我們不讓小熙琳喝盡，餘下少許的蘋果汁，便由熙琳爸、哥哥和我一齊分享，大家一致評語是難飲，哥哥話似雪梨水，熙琳爸話似竹庶水，而我便覺得淡而無味，但是小熙琳極喜歡喝，啜到奶咀都變晒形，有片睇!!

溫馨情景

小熙琳有藍藍姐姐鍚鍚，真好! 好期待小熙琳和大隻仔表哥來一張溫馨合照。

兩個月了

小熙琳已經兩個月大了，今日去健康院打針，佢已有11磅重，身高58.5cm。如果有100個bb，小熙琳的身高由矮至高排第75高，而體重就排第50。

奶咀 vs 啜手指

好多人都話食奶咀的 BB，就唔會啜手指，但係小熙琳兩樣都啱，有時比奶咀給小熙琳，佢會唔肯要，反而要自己的權頭仔，仲食到吱吱聲，好似好好味咁。

八月十五

今個中秋是小熙琳出世後第一個節日，節目多蘿蘿。

早上起床，小熙琳先來一個早操。

這是小熙琳第一次靠自己抬起頭，雖然有些吃力又不太穏陣，但都算有些成績。不過佢還未夠兩個月，就要抬起頭做人，是否太早呢?

小熙琳和最鐘意的人 --- 熙琳爸來一個 afternoon sleep. 平時須要抱抱入睡的小熙琳，今次竟乖乖的躺在熙琳爸身旁，自己入睡。

由於小熙琳耳背和頭頂，出了一些紅點。小熙琳睡醒後，便由熙琳爸揹去看醫生，醫生話這些是皮炎，轉天氣會出現，醫生話佢兩個仔都有，開了一些cream比我們。接著熙琳爸買了一個小花燈給小熙琳。晚上吃飯後，和公公、婆婆到海旁散步兼賞月。

女人勿近

同性相距，異性相吸......對小熙琳來講，此話完全正確，話說昨晚在婆婆家食飯，都有十六人，所有女人抱小熙琳都會喊，我抱都喊，相反男人抱就冇事，唔會喊，連自認好man的姨姨都攪唔掂，姨丈仲可以將小熙琳抱到入睡添。

又一傑作

第二件媽媽牌毛衣又完成了，只用了三天時間，依件衫是尊登織來襯番姨姨送既裙仔，小熙琳著了一定好可愛....嘻!嘻!

抵...抵...抵...

前天行花園街，果度有d出入口店賣既剪牌童裝，都好得架，價錢仲好平添。口水肩都只係 $5件，我買了兩件衫仔給小熙琳都只不過用左 $30 超抵。

失望

小熙琳每天扭眼瞓時，都會喊到拆天，點抱都唔收聲，不過只要熙琳爸一出馬，就算只是熙琳爸一句說話，小熙琳一定收聲，仲好快瞓著，萬試萬靈，我試過等小熙琳收聲後，再由熙琳爸手上抱回小熙琳，但小熙琳即刻又喊番，真比佢激死，小熙琳很痴熙琳爸。唉!真係有d唔開心。

兄妹情深

近來縉軒開始識緊張妹妹，時常都要求抱妹妹，而且手勢開始純熟，仲可以將扭計王小熙琳抱到入睡添，原來縉軒都有番兩下散手。

證據確鑿

剛過去的 Sunday, 首次帶同小熙琳参加藍藍姐姐的生日 Party, 小熙琳很乖的睡覺，並不像屋企時那樣扭計，但卻給大隻仔表哥醒了一巴掌......事原大隻仔表哥和藍藍姐姐坐在一起玩，諗住襯下熱鬧把小熙琳放在大隻仔表哥身邊，來張大合照，點知大隻仔表哥剛好和藍藍姐姐爭玩具，大隻仔表哥被藍藍姐姐一手搶了玩具後，一怒之下竟一巴打在小熙琳頭上發洩，有相為證，不容抵賴......

當然大隻仔表哥應該不是有心的