星期天

今天，天陰落雨，小熙琳又冇得去街街了，不過都唔緊要，有藍藍姐姐來探訪，一件斗篷兩份著，不過都係藍藍姐姐著得好睇d，緊係啦專登為藍藍姐姐炮製喎。接著由我代表小熙琳去青衣城找大隻仔表哥，佢行得好叻呀，還拖著大隻媽行街街，唔知小熙琳再過多幾個月會否好似表哥咁識拖住行街街呢?今次出來是替小熙琳取奶樽，前幾天開奶時，一路搖，一路滴，原來個奶樽列左，正好表哥大個仔了，不需咁多奶樽，於是給了兩個給小熙琳，所以不用買慳番。跟住我一個人去吉之島逛逛，剛巧有折，於是我買了膠地蓆、奶嘴、還買了一隻hello kitty杯給小熙琳，諗住教佢用杯飲水，之後又去藥房買尿片和奶粉，一個人一雙手，所做的嘢，全部都是為了小熙琳。

六個半月的小熙琳

小熙琳六個半月了，又係時候報告小熙琳的發展狀況，現在的她大約70幾80cm高。

1) 識反身：轉身轉得好純熟，最麻煩是每當將她瞓低換片，她便即時反轉身，趴係到 pat pat 朝天，就算除左片片都照反，有便便時，就更麻煩，一隻手要足住她雙腳，另一隻手要做清潔，雖然捉住了她的雙腳，但她仍然要掙扎反身，好似一隻田雞咁，好攪笑，不過小熙琳有時都會幫吓忙，雙手捉住自己雙腳，好等我快快幫她換片。

2) 介夜奶：由年三十晚直到現在年十四，她都沒有半夜起身喊住要吃夜奶了，無論最後一餐奶是晚上9點，還是10點，她照樣瞓到早上6點幾7點才起床起奶，佢自己同自己介了夜奶，終於有覺好瞓，不過她半夜都有醒一醒，通常用奶嘴都好易氹番瞓。


3) 有要求：現在好識扭計，會識炸喊引你注意，有主見要話事，如果佢想要的嘢得唔到會喊會扭。

4) 最愛吃：開始食粥仔差不多都有半個月了，初初食肉片粥，d 肉片緊係冇佢份食，佢只係食白粥，後來在粥內加入南瓜，佢比平時食既速度快好多，後來試過加入菠菜、蛋黃、木瓜，佢每次都可食到一飯碗滿的份量，一日食兩餐，如果d粥熱，佢仲識吹吓佢，好得意架。佢好鐘意食蘋果，如果整得慢未有得食，她會用喊功來催促你。無論是剛食完一碗粥或蘋果或8安奶，她都可以緊接住飲好多水，佢好鐘意飲水，飲唔停，每次都要幫她取出，廢是一肚水。


5) 識 bye bye：小手開始靈活，識用手仔開合bye bye

6)多聲氣：小熙琳日日都好多嘢講，依依呀呀，有時寶寶在佢面前行過，佢會望住寶寶，跟住會發出聲音叫寶寶，而寶寶緊係冇彩佢啦。近這幾天，她時常發出像恐龍的叫聲，她無澄澄自己識，都冇人教。

小熙琳識講嘢?

在聖誕節時，姨姨給了小熙琳一袋bb餅乾，第一次看見她食，有些擔心她唔識吞，原來佢會塔溶了才吞落肚，小熙琳仲撞口掛，講了「係呀」一詞，真係好攪笑。

看牛牛

現在小熙琳轉身得好流暢，仲識捉住床邊，借力起身，雖然未係好夠力，但都起到小小身，攪到要即時起高床欄，遲d仲要較番低塊床板添。
昨晚睡到半夜，睡在我身旁的小熙琳竟然醒了，我看見她用雙手捉住圍欄爬起身，仲眼碌碌望住我，於是我將她按下，她又即刻瞓番。
現在，真的要看牛牛咁睇住小熙琳的一舉一動。

年初四團拜 (二)

當日的小片段....

年初四團拜 (一)

小熙琳和藍藍姐姐不約而同著了 China look，個個一見到小熙琳，都話小熙琳好得意，相反表哥仔就著了一套踢死套，和她們又些格格不入，不過唔緊要笑容塔夠。還記得上個星期食團年飯，小熙琳認人，唔比人抱，攪到我整晚要抱住佢，但今次團拜，小熙琳好醒目，逢人跟，個個抱都得，仲好開心笑，又多嘢講，成晚唔停聲，又主動撩太公傾計，可能知道有利是逗，完全交足戲，明明自己眼瞓都死撐。

年初四團拜相片 (請進)

年初一

年初一，小熙琳一睡醒，緊係要去同熙琳爸拜年逗利是，我抱住小熙琳不斷同熙琳爸說恭賀語，最緊要恭賀熙琳爸身體健康，賺多d錢比小熙琳，向熙琳爸逗完利是後，緊係要調轉由熙琳爸抱住小熙琳向我說恭賀語逗利是，小熙琳好叻架，佢識用左手渣住熙琳爸封利是，右手渣住我給她的利是。

今天，小熙琳搖身一變成為中國娃娃出外拜年，咁可愛既BB當然有唔少進賬啦，不過件衫後來被小熙琳噴奶弄濕，仲攪到熙琳爸一身都係，迫住要除下，好彩熙琳媽我都幾醒目，帶定多套衫，所以小熙琳有衫替換。

年三十晚，小熙琳給自己在臉上劃了一下，攪到自己塊面多了一條長約2cm的小血痕，佢d指甲我都好密密剪和磨滑，但都攪成咁，見到都有d肉痛架，雖然變了花面貓，但都仍然可愛，連在巴士上，坐前面的姐姐仔都專登擰轉頭望實小熙琳。

(^_^)

小熙琳已經六個月大了，係時候要轉更加啱佢營養既奶粉，於是在上個月尾，開始給她轉奶粉，可能急進得濟，看見她都肯食，咁啱舊奶粉食完，於是這幾天全用新奶粉餵哺，但點知佢三天都沒有便便，她從未試過這樣，很擔心。今晚，替她換片片時，發現她有舊便便在門口唔出唔入，於是即刻舖報紙在地上，諗住勒她疴出來，不過舊便便太實，小熙琳冇辦法疴到出來，可能唔舒服，又可能痛痛，她不斷喊，不是平時的喊聲，係喊得很淒涼，看見她這樣，真的很心痛，只想快些幫她解決，於是我用尾指不斷幫她挖出來，她不斷的喊，只好安慰她說：「媽媽想幫你炸」、「出力啦.....嘩.....好叻喎......係勒.....係勒.....出力啦.....得架.....」，對白有些似生小熙琳時，姑娘向我說的加油說話，就是這樣小熙琳一邊努力，我就一邊幫她挖出來，最後，她疴到兩舊吋幾長的便便，個門口終於合埋了，於是幫她做清潔，當然先要清潔自己雙手，整個過程我都不覺核突，我一心只係想快些幫小熙琳解決，而縉軒哥哥就話好臭，一早搵窿捐。之後，抱小熙琳番床著片片，可能辛苦過後，小熙琳一放落床，雙手大字形放軟，完全唔郁，其實佢都好辛苦、好出力，在這樣得十度的寒冷天氣，她面上都有汗水架，等到熙琳爸放工回來，熙琳爸買了BB飲既果汁回來給小熙琳，每人都為小熙琳出一分力。

後記：我已買回舊奶粉給她吃，現在回復正常，她每天都有臭臭，轉奶粉的事，慢慢再來過。

寒冷天氣已持續十天了，小熙琳日日都著到成個小冬瓜一樣，看見佢就辛苦，多衫到連佢自己左手同右手都握唔到，農曆新年就到，咁點樣學請請呀，不過我知小熙琳如果唔識請請，大家都會自動自覺比利是佢既。

昨天，小熙琳開始食佢既第一餐粥仔---瘦肉粥，可能係第一次食，佢冇食糊仔咁鐘意。小熙琳開始認人，昨晚到婆婆家食團年飯，全屋十幾人，冇一個可以抱到小熙琳，攪到我成晚要抱住佢添，小熙琳呀.....小熙琳呀.......你要個個都跟先得人鐘意架。