失望

小熙琳每天扭眼瞓時，都會喊到拆天，點抱都唔收聲，不過只要熙琳爸一出馬，就算只是熙琳爸一句說話，小熙琳一定收聲，仲好快瞓著，萬試萬靈，我試過等小熙琳收聲後，再由熙琳爸手上抱回小熙琳，但小熙琳即刻又喊番，真比佢激死，小熙琳很痴熙琳爸。唉!真係有d唔開心。

兄妹情深

近來縉軒開始識緊張妹妹，時常都要求抱妹妹，而且手勢開始純熟，仲可以將扭計王小熙琳抱到入睡添，原來縉軒都有番兩下散手。

證據確鑿

剛過去的 Sunday, 首次帶同小熙琳参加藍藍姐姐的生日 Party, 小熙琳很乖的睡覺，並不像屋企時那樣扭計，但卻給大隻仔表哥醒了一巴掌......事原大隻仔表哥和藍藍姐姐坐在一起玩，諗住襯下熱鬧把小熙琳放在大隻仔表哥身邊，來張大合照，點知大隻仔表哥剛好和藍藍姐姐爭玩具，大隻仔表哥被藍藍姐姐一手搶了玩具後，一怒之下竟一巴打在小熙琳頭上發洩，有相為證，不容抵賴......

當然大隻仔表哥應該不是有心的

第一件外套

終於完成小熙琳的第一件媽媽牌外套!!

So Funny

的確好玩的 web site..... 謝謝 Kiros 媽的介紹


Make your own Glitter Graphics

繁忙的一朝早

今日，帶小熙琳到健康院打針兼見醫生，小熙琳又重咗啦，醫生都話小熙琳由出世的磅數(2.91kg)到現在的 4.13 kg (9 磅)，算係增磅得唔錯。

至於黃疸方面，雖然黃疸度數正在下降，但仍有些黃，穩陣起見，醫生即寫紙給我們到屯門醫院抽血，檢查一吓肝有冇事，如果冇問題就除得d黃慢慢退，我們要趕在11:15分前到達屯門醫院兒科，但又要等打針，咁啱小熙琳又肚餓，攪到好趕，而且我們沒有預到要去咁遠，所以裝備不足，佢後來比d屎整污 joe 件衫，都冇得換，唯有除左佢，只著住件底衫，露出個大肶仔，而且只帶了兩塊片，緊緊夠用，奶粉當然冇預備，幸好屯門醫院兒科部有哺乳房，否則都唔知點算。

小熙琳的嘴嘴，原來不是弄損，醫生話係血管胎痣，會跟住BB一齊長大，可能會凸起，直至兩歲便會開始慢慢收縮，但要十幾歲才能原全冇晒，由於小熙琳的血管胎痣生在嘴嘴上，驚影響進食，又驚弄損出血受感染，所以要密切留意，唉! 又會生在咁顯眼的地方，第日出了牙仔又驚佢咬親流血。 平時係屋企，小熙琳通常都要扭一大餐才瞓得著，但點知佢今日無論在健康院或是在屯門醫院都出奇地好瞓，完全唔扭，就好似在健康院，姑娘要同佢打針，要我們弄醒佢，拍了好耐佢都唔醒，姑娘都拍埋一份，話佢做乜咁好瞓，唔通小熙琳鐘意落街瞓覺。

滿月

終於滿月了，實在太多人錫小熙琳了，收了太多禮物和利是，多謝各位曾付出過的 Auntie 、Uncle 和 各位公字輩、婆字輩的親友。

一個月了，小熙琳學會了扭眼瞓要人抱、扭計、發忟憎。小熙琳最鐘意被人抱住行、抱住瞓、洗白白；最唔鐘意洗舌頭，次次都會勁響警號(狂喊)。