疲倦的一天

今天天氣很好，陽光普照，又係星期日，最適宜帶小熙琳出外走走，抖抖氣，於是帶了小熙琳到沙灘、公園玩了半天，同行的還有藍藍表姨、舅婆、公公、婆婆、姨姨、姨丈和鍵朗表哥，當然還有姨姨果部靚靚相機，要幫小熙琳影番d靚相嘛，我們由屯門碼頭一直朝著沙灘的方向行，沿途四處停留拍照、玩耍。其間藍藍表姨和鍵朗表哥在草地上玩肥皂泡，小熙琳未識行，不能去捉波波，只可用眼睛去追住d波波，不過藍藍表姨都冇忽略小熙琳，她會主動走到小熙琳身旁和她玩玩。


今天小熙琳好精神，充滿笑容，她和表哥竟然可以晏覺都唔瞓。要安排他們三人合照，是有相當難度，影了好多張，才得這兩張三人行的相片，小熙琳其實都算幾高，同大佢半年的表哥相比下，只差半個頭。

後來，我們到沙灘玩耍，小熙琳第一次到沙灘，近距離接觸 --- 沙，我都估唔到小熙琳咁大膽，腳仔在沙地上摔來摔去，一d都不怕。

一天一天的進步

現在的小熙琳一日一日唔同，一天一天的進步，前幾天她不斷自己un吓un吓，無論企係到，坐係到，甚至洗白白，她都不停地un un都幾得意架。今天，放工番來仲有新發現，小熙琳靠自己的力量竟然可以扶住床邊企起身，雖然有些不穩，但已有進步了，現在真係睇小眼都唔得。

例行檢查

今天，又係時候帶小熙琳到健康院檢查兼打針，準時11:00到達並掛號，好快就聽到姑娘叫余熙琳到2號房磅重，今次小熙琳可以剝淨條片片唔駛剝晒光豬，得出來的結果是7.57kg，扣除片片我諗應該有16磅半，在同齡BB中，小熙琳屬於中間級別；跟住去見姑娘，姑娘需要評估小熙琳的發展狀況，我抱住小熙琳坐在護士枱旁，姑娘不斷在排板上做記錄，而小熙琳的手仔不斷向前伸，想取姑娘寫緊既紙，姑娘問小熙琳：「妳想做乜，d紙唔係你。」後來，姑娘索性給她一個搖鈴，點知個搖鈴剛遞到小熙琳面前，小熙琳便一手搶去，姑娘話唔洗睇都知佢精靈，跟住又坐在枱上給姑娘看看，姑娘話佢坐得幾好，好硬淨，腳仔都有力，幾好唔錯，今次又合格la；今日要打兩枝針，乙型肝炎和四合一，左脾打一枝右脾打一枝，小熙琳緊係有喊啦，不過都好快收聲。

唔認得

今天，寶寶去了剪毛，扮靚靚，唔駛再做長毛賊，寶寶剪完毛番到屋企，成個樣唔同晒，小熙琳看見寶寶的時候，眼定定望左寶寶一 陣，可能有些唔認得寶寶，佢見慣的寶寶不是這樣的，不過佢好快都叫聲寶寶，小熙琳一d都唔怕寶寶，而寶寶又唔會好似對縉軒哥哥咁對小熙琳，不過始終都有些危險性，所以小熙琳都唔係時常可以摸寶寶，要寶寶沖完涼，又要我係到控制寶寶才可，當然摸完寶寶，我都會第一時間帶小熙琳用梘液洗手。

小霸王

小熙琳都幾惡死，佢竟然蚊表哥頭髮，攪到表哥都怕了她，見到佢都要調頭走，唔敢摸她，藍藍姐姐就似一個大姐姐，同小熙琳玩得很開心。

星期天

今天，天陰落雨，小熙琳又冇得去街街了，不過都唔緊要，有藍藍姐姐來探訪，一件斗篷兩份著，不過都係藍藍姐姐著得好睇d，緊係啦專登為藍藍姐姐炮製喎。接著由我代表小熙琳去青衣城找大隻仔表哥，佢行得好叻呀，還拖著大隻媽行街街，唔知小熙琳再過多幾個月會否好似表哥咁識拖住行街街呢?今次出來是替小熙琳取奶樽，前幾天開奶時，一路搖，一路滴，原來個奶樽列左，正好表哥大個仔了，不需咁多奶樽，於是給了兩個給小熙琳，所以不用買慳番。跟住我一個人去吉之島逛逛，剛巧有折，於是我買了膠地蓆、奶嘴、還買了一隻hello kitty杯給小熙琳，諗住教佢用杯飲水，之後又去藥房買尿片和奶粉，一個人一雙手，所做的嘢，全部都是為了小熙琳。

六個半月的小熙琳

小熙琳六個半月了，又係時候報告小熙琳的發展狀況，現在的她大約70幾80cm高。

1) 識反身：轉身轉得好純熟，最麻煩是每當將她瞓低換片，她便即時反轉身，趴係到 pat pat 朝天，就算除左片片都照反，有便便時，就更麻煩，一隻手要足住她雙腳，另一隻手要做清潔，雖然捉住了她的雙腳，但她仍然要掙扎反身，好似一隻田雞咁，好攪笑，不過小熙琳有時都會幫吓忙，雙手捉住自己雙腳，好等我快快幫她換片。

2) 介夜奶：由年三十晚直到現在年十四，她都沒有半夜起身喊住要吃夜奶了，無論最後一餐奶是晚上9點，還是10點，她照樣瞓到早上6點幾7點才起床起奶，佢自己同自己介了夜奶，終於有覺好瞓，不過她半夜都有醒一醒，通常用奶嘴都好易氹番瞓。


3) 有要求：現在好識扭計，會識炸喊引你注意，有主見要話事，如果佢想要的嘢得唔到會喊會扭。

4) 最愛吃：開始食粥仔差不多都有半個月了，初初食肉片粥，d 肉片緊係冇佢份食，佢只係食白粥，後來在粥內加入南瓜，佢比平時食既速度快好多，後來試過加入菠菜、蛋黃、木瓜，佢每次都可食到一飯碗滿的份量，一日食兩餐，如果d粥熱，佢仲識吹吓佢，好得意架。佢好鐘意食蘋果，如果整得慢未有得食，她會用喊功來催促你。無論是剛食完一碗粥或蘋果或8安奶，她都可以緊接住飲好多水，佢好鐘意飲水，飲唔停，每次都要幫她取出，廢是一肚水。


5) 識 bye bye：小手開始靈活，識用手仔開合bye bye

6)多聲氣：小熙琳日日都好多嘢講，依依呀呀，有時寶寶在佢面前行過，佢會望住寶寶，跟住會發出聲音叫寶寶，而寶寶緊係冇彩佢啦。近這幾天，她時常發出像恐龍的叫聲，她無澄澄自己識，都冇人教。