五天工作真的不錯!

自從有了小熙琳後，好多時逛街都會特別留意BB衫，今日星期六得閒，四處逛逛，諗住睇吓有冇嘢啱買，去了UNIQLO睇吓，可惜冇衫啱小熙琳。我同事Carol前幾天告訴我，荃灣有到買BB衫好平10元有交易，於是由尖沙咀轉移陣地到荃灣，去到真的發現十元有交易，質料、款式都不差，可惜尺碼太細，多數是零至三個月，我只係搵到兩條褲仔給小熙琳，不過，都有其他啱小熙琳尺碼的，價錢都只不過係廿幾蚊，於是乎替小熙琳入了些貨。

我做姨媽的，都有掛住表哥仔架，係尖沙咀逛街時，都買了件衫比佢。

8個半月的小熙琳

又係時候分享小熙琳的成長....

1) 8個半月的小熙琳身高約70cm，體重約18磅，開始有些頭髮，右眼大過左眼，兼且擁有18吋小蠻腰和13吋長美腿。
2) 識得自己飲水，由細到大都很喜歡飲水，可以一口氣飲晒杯水，有時怕她飲得太多，飽得濟，次次都要同佢鬥搶個杯，佢搶輸左又喊，所以現在個杯不會裝 太多水，等佢飲完就算。


3) 小熙琳最喜歡扶住床邊企在床上，可能佢雙腳仔有些份量，攪到張床褥扁晒，有床褥同冇床褥都冇乜分別，原來佢晚晚都係瞓緊木板咁可憐，於是乎即刻同佢落order訂番張床褥比佢。

4) 已經有兩隻小牙仔同大家見面啦。

5) 不經不覺小熙琳已學識爬爬了，如果有目標更會爬得起勁些。

6) 勁喜歡洗白白，喜歡玩水，每天洗白白的時間，小熙琳都很開心，但係上水那一刻就很麻煩......喊到拆天都唔識收聲。

7) 經過這8個月的觀察與學習，小熙琳自己已經揣摩到，怎樣做一個刁蠻公主了，每蓬得唔到她想要的東西，她便會喊、便會扭，直至得到為止。

8) 小熙琳肚裏有一個鐘，超準時!每晚9:00便要食奶奶瞓覺覺豬，到第二朝大概6點半起床唱歌仔，日日如是，全屋最早瞓的係小熙琳，最早起床都係小熙琳，當然我都會奉陪到底，不過小熙琳都唔係一覺瞓到大天光，通常半夜都會醒，有時當我睜開眼會看見她成個坐起身，有時看見她扶住床欄企係到望住我，有時好快便瞓得番，有時等成個鐘都仲眼仔碌碌，咁我都會陪佢眼仔碌碌，我的睡眠時間完全受到小熙琳所控制。

9) 小熙琳唔識甚麼叫錫錫，叫佢鍚鍚，佢唔識做，但有時她會突然用 "o" 型嘴啜我塊面，當然加送一堆口水，有次佢啜我塊面，我又啜番佢，佢又好肉緊出動 "o" 型嘴啜番我，大家來來回回幾次，都好得意，不過就成面口水。

下次見

爺爺、嫲嫲已回美國了，雖然小熙琳和爺爺、嫲嫲是首次見面，但在這短短的相處時間裏，小熙琳都冇怯場，都幾好，當下次再見面的時候，相信小熙琳已識行，說不定還會說聲：『爺爺、嫲嫲』

打敗仗

昨晚，發現小熙琳額頭仔有些慶慶地，於是乎替她吉下law友仔，38.9度都幾高，立刻餵她食退燒藥，小熙琳自出世以來第一次發燒，無論她打針或是出牙仔，她都從未試過發燒，真有些擔心自己處理不好。今日，請了半天假，帶小熙琳睇徐醫生，經過徐醫生的細心檢查，得知小熙琳有些少喉嚨發炎，可能因為咁而發燒，她還有幾聲咳。不過，小熙琳精神都不錯，都肯食粥、飲奶、飲水，熙琳BB要加油呀! 快d好番。

兩個驚喜

前天放工回家，發現小熙琳右眼有條雙眼皮線，她曾經都試過有，但未夠一小時便逐漸消失，今次就不同，今天已是第二天，仍然係雙眼皮，但係只係得右眼，弊啦!小熙琳現在變咗鴛鴦眼添，唔知隻左眼幾時會好似右眼咁由單眼皮變為雙眼皮呢? 第二件驚喜是，今天看見她的牙肉有些白色，於是我洗乾淨隻手，伸隻手指去摸吓啦，我摸到有d吉手，我諗：「小熙琳出牙仔啦!」

超難度動作

BB是天生的瑜珈高手，更不可睇少BB的柔軟度，小熙琳近幾天時常玩腳，用把口來玩，她終於識啜腳指，重要係啜腳指公，依D動作唔係人人都可以做得到，「家庭觀眾切勿模仿」。

退役

親愛的相機先生：

首先要向你說聲多謝，自從上年八月小熙琳來臨那一刻開始，你便辛勞地為小熙琳的成長做記錄，在這短短的七個幾月裏，你替小熙琳拍下了接近二千張相片，真係辛苦晒，現在你因健康理由而需要提早退休，當然真的很想挽留你。現在正傷腦筋的是要找一個怎麼樣的接班人，已有兩個人選，一是數碼相機，二是數碼單鏡反光相機，兩者各有其優點和缺點，真的好難決擇，現在謹希望你的眼朦症早日康復!

感激你的人

熙琳媽敬上