一天一天的轉變

小熙琳一日一日唔同，前天放工回家，看見她多了放手自己行的時間，不用拖拖，行得雖然有些不太穩陣，好似飲醉酒似的，但見佢已經很努力。昨天，放工回家看見小熙琳，她完完全全不雖要人拖了，自己行來行去，行得都唔錯，比起前晚更加大有進步，看得出她自己都很開心，時常一路行一路拍手仔，以目前的進展來看，相信小熙琳到一歲生日的時候，會行得穩穩陣陣。

前天的小熙琳

昨天的小熙琳

Swimming

昨天(星期六)，天氣很好，十分炎熱，姨姨邀請我們到會所游水，這是小熙琳的第一次，當然要給她準備妥當啦! 給她預備了紙泳褲，當然還有藍藍不合用給小熙琳的水泡，不過沒有給她買泳衣，因她大得快，很快不合穿。


為了讓小熙琳有精神玩，一早便氹她覺覺豬，但攪了很久，她才能入睡，但唔知點解她瞓得半小時便扎醒咗，唯有出發到姨姨家。初初有些擔心她會唔會驚，始終是第一次，雖然不見得她十分興奮，但起碼她唔驚，不過佢唔係咁鐘意坐水泡，唯有扶住她慢慢行，抱住她扮游水，她都很合作都有郁下手仔腳仔。

玩了大概45分鐘，我們被迫清場離開，好似好短暫，有些唔夠喉，下次要再早些出門口，不過對bb來講可能已經夠晒，他們個個雙手都巢晒皮，仿佛老了十年，小熙琳年紀最細，但雙手看來係最老的一個。

跟住回姨姨家等表哥洗完白白，便輪到小熙琳了，小熙琳繼續玩水，仲取埋表哥的沖涼玩具玩添。姨姨為小熙琳預備了美味的南瓜三文魚粥，小熙琳進食的速度比平時食粥仔快了一倍，我相信原因可能係剛游完水勁肚餓；又或是隔離飯香；小熙琳是第一次食三文魚粥，又可能是真的太好味，等我下次放假又試下煲比佢食，睇吓佢係咪真係鐘意食先。


原來半個鐘頭的睡眠，可以捱到整晚，其實看見小熙琳雙眼，已經很眼瞓，但她仍然通屋行，冇時停，好似完全唔眼瞓咁，但當我們離開後，小熙琳完全變了第二個人一樣，很安靜，很快便入熟睡，點攪都唔醒。


P.S.
(1) 要謝謝姨姨的熱情款待，無論小熙琳和我都食得飽飽
(2) 要謝謝舅公的防水相機，否則大家就沒有相片和video睇

十一個月的小熙琳

現在的她有80cm高，腰圍有18吋，腳板仔有5吋長，有兩隻牙仔，上面都開始出牙仔了，已經看見少少白色，但只得右邊，左邊還未有，咁到時兩隻牙仔便有高低之分，會唔會好怪呢?

1) 小熙琳是個精力充沛的BB，冇時停，少些體力都頂唔順，不過我現在都已經習慣了，熙琳爸時常都話我，做乜生隻馬騮仔出來，攪到自己咁辛苦。

2) 她很喜歡發聲，每朝一早便吖吖聲大叫，唔知的還以為養了一隻了哥。有時遇到不合她心意的地方，例如抺面啦! 她攪緊某些東西，又要捉佢去換片片啦!她就會吹銀雞咁發出很大的尖叫聲，以示抗議。

3) 小熙琳仍然很喜歡沖涼玩水，尤其是拍打水面，攪到整個廁所都濕晒，變成一個水塘。

4) 每天她都會拖住我全屋行來行去，不過她暫時仍不敢放手自己行，只有間中一兩次鎮鎮吓咁自己行，她一定會找人拖住佢或扶住d物件前進，否則她就會採用爬的方法。

相簿 DIY

上次小熙琳在studio的相片終於整理好，由晒相到買相簿的材料，都是一腳踢，不過完全過足手癮，兩本相簿共有46張相片，每一張相都要貼上一塊油畫質地的保護膜，然後逐張貼在相簿裡，接著製作封面，便大功告成。

忽然細膽

下了差不多兩星期雨，今天終於可以見到太陽了。

酷熱天氣警告也生效，於是今天的小熙琳的戶外活動，便到沙灘散步。

有婆婆擔 (姐)，公公抱抱，小熙琳都幾嘆喎!

小熙琳唔肯落地行，識得要抱抱。

多多動作的小熙琳

小熙琳忽然細膽，唔敢張雙腳放在水中，又唔敢落在沙上，係都要公公抱抱。

快來看吧!

終於有相睇啦! 間studio都唔錯，整埋個網上相簿，好讓我能給大家分享一下，小熙琳努力的成果，仲有歌仔配樂添。

http://www.studio123.hk/onlinealbum/2008-06-17/cailne.html

辛苦la 小熙琳

通常而家d媽咪都鐘意帶bb去studio影輯靚相留念，我也不例外，今天帶了小熙琳到studio影相，平時的小熙琳活潑到爆登，笑容滿面，心想要影輯靚相應該不難，可昔事與願違。今日的小熙琳狀態麻麻地，可能小熙琳自己一人坐在布景裏，看見旁邊的人不斷we we wa wa引佢發笑，有些驚，很多時都不肯坐低，攬到我實一實，從未見過她喊得咁淒涼，每一輯相都是因為喊到拆天而終結，所以幾經辛苦才完成4個造型，我們只影到108張相。

造型1 --- 可愛的士多啤利

小熙琳不喜歡頭頂帶東西，時常蚊低個士多啤利粒定，攪到有些相唔似粒士多啤利。

造型2 --- 驕俏的女護士

幸好小熙琳都合作，沒有蚊下護士帽，否則似個病人look多個似個護士。

造型3 --- 愛哭的小天使

這輯相是最多眼淚、鼻涕的一輯，可能小model有些疲倦的關係啦!

造型4 --- ？？的小魔鬼

抱小熙琳入布景時，原全不肯坐低，攬實我不肯放，不斷喊，真的太疲倦和眼瞓了，我們要出動餅餅，才能完成這個造型。

影到最後的小魔鬼，小熙琳完全不受控制，不停地喊，因為佢好眼瞓，於是咩住佢離開studio，一出studio門口佢已經收聲了，落到街，仲四處望，無幾耐仲瞓著埋，我們食完嘢番去睇相時，小熙琳剛醒來，恰好趕得及看看自己辛苦得來的成果，那時的小熙琳都不知幾精靈，還引ｄ攝影哥哥笑添。

（等影樓整好個網上相簿，大家便可看看小熙琳辛苦得來的成果）